दहशतवादाविरुद्ध लढण्यासाठी

दहशतवादाविरुद्ध लढण्यासाठी जागतिक स्तरावर एकत्रित प्रयत्न व्हायला हवेत,' असे आवाहन पंतप्रधान नरेंद्र मोदी यांनी रविवारी जी-२० देशांच्या परिषदेत केले. अमेरिकेचे अध्यक्ष बराम ओबामा यांनीही 'आयएस'चे जाळे उद्ध्वस्त करण्यासाठी दुपटीने प्रयत्न करण्याची ग्वाही दिली.

जी-२० शिखर परिषदेला तुर्कस्तानमध्ये रविवारी सुरुवात झाली. पॅरिसमध्ये झालेल्या दहशतवादी हल्ल्याची गडद छाया परिषदेमध्ये पाहायला मिळाली. या परिषदेमध्ये सर्वसमावेशक आर्थिक विकास आणि हवामान बदल यावर चर्चा होणे अपेक्षित होते. मात्र, पॅरिसमधील दहशतवादी हल्ल्यानंतर दोन दिवस चालणाऱ्या या परिषदेमध्ये दहशतवादाविरोधात अधिक समन्वय, माहितीचे आदानप्रदान, दहशतवाद्यांना मिळणाऱ्या निधीची रसद तोडणे यांवर ठराव संमत केला जाणार आहे. दहशतवादावरील ठराव हा शिखर परिषदेच्या मुख्य घोषणापत्रापेक्षा वेगळा असेल.

शिखर परिषदेला सुरुवात होण्यापूर्वी अमेरिकेचे अध्यक्ष बराक ओबामा यांनी जागतिक नेत्यांबरोबर स्वतंत्रपणे संवाद साधला. यामध्ये तुर्कीचे अध्यक्ष रेसिप अर्दोगान यांचाही समावेश होता. पॅरिसमधील हल्लेखोरांचा पर्दाफाश करण्यासाठी फ्रान्सच्या पाठीशी राहण्याचा आणि 'आयएस'चे जाळे उद् ध्वस्त करण्याचा निर्धार ओबामा यांनी व्यक्त केला. ओबामा म्हणाले, 'सीरियामध्ये शांततापूर्ण सत्तांतर होण्यासाठी आणि पॅरिस, अंकारासह जगातील इतर देशांतील लोकांना त्रासदायी ठरणाऱ्या 'आयएस'ला नष्ट करण्यासाठी मित्रदेशांतील सदस्यांबरोबर दुपटीने आम्ही प्रयत्न करू.'

अर्दोगान म्हणाले, 'जी-२० परिषदेत आंतरराष्ट्रीय दहशतवादाविरोधात आमची भूमिका अधिक कठोरपणे मांडली जाईल, असा मला विश्वास वाटतो.' रशियाचे अध्यक्ष व्लादिमिर पुतिन म्हणाले, 'आंतरराष्ट्रीय समुदायाने एकत्रित प्रयत्न केले, तरच जगाला दहशतवादाचा सामना करता येईल. जी-२० परिषदेच्या पार्श्वभूमीवर पंतप्रधान नरेंद्र मोदी यांनी 'ब्रिक्स' देशांच्या नेत्यांशी चर्चा केली. पॅरिसमधील दहशतवादी हल्ल्याचा या वेळी निषेध करण्यात आला.
....

संयुक्त राष्ट्रांच्या सर्वसाधारण सभेकडे दहशतवादाविरुद्ध आणि अतिरेकी हिंसाचाराविरुद्ध तयार होणाऱ्या सर्वंकष नियोजनाचा आराखडा सुपूर्द करू.
- बान की मून, सरचिटणीस, संयुक्त राष्ट्रे

दहशतवादाविरुद्ध सर्व मानवी समुदायाने एकत्र उभे ठाकले पाहिजे. दहशतवादाचा सामना करण्यासाठी जागतिक पातळीवरील एकत्रित प्रयत्नांची तातडीने गरज आहे. ब्रिक्स देशांसाठीही हेच प्राधान्य असायला हवे.
- नरेंद्र मोदी, पंतप्रधान

पॅरिसमधील दहशतवादी हल्ला हा केवळ फ्रान्स, तुर्कीवरील नव्हता, तर नागरी सभ्यतेवरील हा हल्ला होता. या हल्ल्यातील दहशतवाद्यांना नष्ट करण्यासाठी आणि त्यांना शासन करण्यासाठी फ्रान्सचे अध्यक्ष ओलांद आणि फ्रान्सच्या नागरिकांबरोबर आम्ही एकजुटीने उभे राहू.
- बराक ओबामा, अध्यक्ष, अमेरिका

* दहशतवादाविरुद्धच्या ठरावातील अपेक्षित मुद्दे

>> दहशतवाद्यांना मिळणारा निधी रोखण्यासाठी आर्थिक कृती विशिष्ट कार्यगटाची स्थापना करण्यात येणार.

>> हा कार्यगट 'आयएस'सारख्या दहशतवादी संघटनांना मिळणारा निधी रोखण्याचे आणि तेलव्यवहारात होणारा गैरव्यवहार रोखण्याचे काम करणार.

>> तंत्रज्ञान, संवादयंत्रणा, दहशतवादाला चालना देण्यासाठी असणारे स्रोत, इंटरनेट यांपासून दहशतवाद्यांना वंचित ठेवण्यासाठी प्रयत्न

शहराला लष्करी छावणीचे रूप

पॅरिसवरील हल्ल्यानंतर संभाव्य धोके टाळण्यासाठी अंताल्या शहराला लष्करी छावणीचे रूप आले आहे. संगीताच्या सर्व मैफिली, अधिकाऱ्यांचे भोजनसमारंभ रद्द करण्यात आले आहेत. हजारो सुरक्षा रक्षक आणि उच्च तंत्रज्ञानाने युक्त टेहळणी यंत्रणा परिषदेवर लक्ष ठेवून आहेत. दहाव्या जी-२० परिषदेसाठी जगभरातून सुमारे १३ हजार अधिकारी, तीन हजार पत्रकार आले आहेत. क्षेपणास्त्र आणि ड्रोन हल्ले रोखण्यासाठी लष्कर तैनात करण्यात आले आहे.